الزهرة الذابلة...

الزهرة الذابلة
قطفتك وانت زهرة ذابلة
غرستك في حوض بين النوار
ڭلتْ ليك هذ العرصة ليك كاملة
سقيتك وجذورك سرحو في الدوار
نوّرتِ وللرحيق صبحتِ حاملة
طواليتِ وطلّيتِ على حقولْ لجْوار
***************
غرﱡاتك الروايح المعطرة
والوان الورد والازهار
بديتي تزوقي في الهضرة
وكذوبك طلع عليه النهار
لما في يوم سرقت نظرة
لقيتيها مسقية بالواد الحار
ندمت لكن جات متأخرة
بعدما طاحت يديك في النار
بانت ليك الحقيقة المرة
ولا ظهرت المعنى ما بقى تكرار
*****************
آش دّاك ودهاك يا فلانة
دخلتِ للصّهد الحامي
مشيت للرذالة زربانة
وڭلت بلغوه سلامي
من العز مشيت هربانة
وڭلت هنا نحقق احلامي
لقيت راسك ندمانة
وڭلت يا ويح ايامي
***************
ڭالت ظفر بي قبل ما نضيع
ونردو الما لمجراه
ڭلت لها للي باعني بغاني نبيع
وللي زلق جا على عين ڭفاه
*******************

عبد الله الدهيمي